استخدام القصص في المحتوى لجذب المتابعين

المحتوى الجيد مو بس معلومات وأرقام، بل هو تجربة، إحساس، ورحلة يعيشها المتابع معك. كثير من صناع المحتوى الناجحين يستخدمون القصص كأداة رئيسية لجذب الناس وبناء علاقة قوية معهم. ليه؟ لأن القصة تحفّز المشاعر، تخلق تفاعل، وتترك أثر ما ينسى بسهولة.

تخيل محتوى عن النجاح في ريادة الأعمال، لو قدمته بشكل مباشر بذكر استراتيجيات وأرقام، يمكن بعض الناس يستفيدون، لكن لو حولت الموضوع إلى قصة شخص بدأ من الصفر، واجه صعوبات، تعب، فشل، لكنه استمر إلى أن نجح، فجأة يتحول المحتوى إلى شيء مؤثر وممتع للمتابع، ويصير يبي يعرف النهاية!

كل قصة عظيمة تبدأ بلحظة تشدّ الانتباه. لا تبدأ كلامك بجملة عادية، بل ضع المتابع في وسط الأحداث مباشرة. مثلا، بدل ما تقول: “كنت أواجه صعوبة في إدارة وقتي”، قل:

“كانت الساعة 2 بعد منتصف الليل، وأنا جالس وسط أكوام من الأوراق، عيوني تحرقني من التعب، وداخلي صوت يقول لي: هل هذا يستحق كل هذا العناء؟”

بهذه الطريقة، المتابع يبي يعرف القصة، إيش صار بعدين؟ هل تجاوزت المشكلة؟ كيف؟

كل ما كانت القصة شخصية، كل ما كان تأثيرها أقوى. لا تتردد في مشاركة تجاربك، حتى اللحظات اللي حسيت فيها بالفشل أو الضياع. الناس يرتبطون بالقصة اللي يحسون أنها واقعية وتعبر عنهم.

التفاصيل الصغيرة تخلي القصة أكثر واقعية. مثلا، بدل ما تقول: “كنت سعيدًا”، صف المشهد:

“لما وصلتني أول رسالة شكر من أحد المتابعين، حسيت بفرحة غريبة، ضحكت لحالي وأنا أشوف الشاشة، وقلت في نفسي: أخيرًا، شغلي قاعد يحدث فرق!”

هذا الأسلوب يخلي المتابع يحس بالموقف وكأنه موجود فيه.

أي قصة بدون رسالة واضحة تضيع. لا تحكي قصة لمجرد الترفيه، بل لازم تكون مرتبطة برسالة تفيد المتابع. مثلا، إذا كنت تبي تتكلم عن أهمية الاستمرارية، احكي عن كيف فشلت في شيء معين بسبب اليأس، لكن لما صبرت، تغيرت الأمور وصرت أفضل.

بعد ما تروي قصتك، لا تجعلها مجرد حكاية تنتهي، بل اربطها بالمتابع. اسأله:
• “قد مرّيت بتجربة مشابهة؟ شاركني في التعليقات.”
• “إيش رايك في هذا الموضوع؟ هل توافقني أو عندك تجربة مختلفة؟”

هذا يحفّز التفاعل ويخلق علاقة أقوى بينك وبين جمهورك.

الناس ما يتذكرون الأرقام بسهولة، لكن يتذكرون القصة. لما تبي توصل فكرة أو معلومة، حاول تغلفها داخل قصة ممتعة، لأن هذا هو السر اللي يخلي المحتوى يوصل للقلوب قبل العقول.

سواء كنت تكتب تغريدة، مقال، أو حتى فيديو، خلك راوي قصص محترف، وراح تلاحظ كيف جمهورك يتفاعل معك بشكل أقوى وأعمق.